چائلڈ میرج کے خلاف آسام حکومت کی کارروائی جاری، پجاری اور قاضی سمیت اب تک 2200 سے زائد افراد گرفتار

دوسری طرف اس کارروائی کے خلاف آوازیں بھی بلند ہونے لگی ہیں۔ خصوصاً مسلم تنظیمیں گرفتاری کے عمل کو بی جے پی کی مسلم دشمنی سے تعبیر کر رہی ہیں۔ آل انڈیا مجلس اتحاد المسلمین کے سربراہ اسدالدین اویسی نے آج اپنے ایک بیان میں کہا کہ ’’آسام حکومت مسلمانوں کی مخالفت میں کام کر رہی ہے۔ جن کی شادی ہو چکی ہے ان لڑکیوں کا آپ کیا کریں گے؟ ان کی دیکھ بھال کون کرے گا؟‘‘

اس سے قبل اے آئی یو ڈی ایف سربراہ بدرالدین اجمل بھی وزیر اعلیٰ ہیمنت بسوا سرما کے ذریعہ چائلڈ میرج کے خلاف ہو رہی سخت کارروائی پر اعتراض ظاہر کر چکے ہیں۔ 3 فروری کو انھوں نے اپنے ایک بیان میں کہا کہ پہلے عوام کے درمیان بیداری پیدا کی جانی چاہیے تھی اور مہم چلا کر لوگوں کو سمجھانا چاہیے تھا۔ اس طرح اچانک کارروائی ہونے سے لوگوں میں دہشت پیدا ہو گئی ہے۔ بدرالدین اجمل نے یہ بھی کہا کہ ریاست کی بی جے پی حکومت یہ کارروائی مسلمانوں کے خلاف کر رہی ہے، کیونکہ جب گرفتاریوں کا جائزہ لیا جائے گا تو پتہ چلے گا کہ 90 فیصد تعداد مسلمانوں کی ہے۔